Осы Конвенцияның мақсаттары үшін "тұрақты мекеме (өкілдік)" термині кәсіпорынның кәсіпкерлік қызметпен толық немесе ішінара айналысатын тұрақты қызмет орнын білдіреді. 2. "Тұрақты мекеме (өкілдік)" термині, атап айтқанда, мыналарды қамтиды: а) басқару орны; б) бөлімі; с) кеңсе; д) фабрика; е) шеберхана; f) шахта, кеніш, мұнай немесе газ скважинасы, карьер немесе табиғи ресурстар өндірілетін басқа да кез-келген орын. 3. "Тұрақты мекеме (өкілдік)" термині сондай-ақ мыналарды қамтиды; а) құрылыс алаңы немесе құрылыс, монтаждау яки құрастыру объектісі немесе осы жұмыстардың орындалуын қадағалауға байланысты қызметтер, егер мұндай алаң немесе объект 6 айдан астам уақыт бойы жұмыс істеп тұрған болса ғана, немесе мұндай қызметтер 6 айдан астам уақыт бойы көрсетілген болса; б) табиғи ресурстарды барлауға пайдалану немесе басқа да қызмет осы жұмыстардың орындалуын бақылауға байланысты бұрғылау қондырғыларын орнату, табиғи ресурстарды барлау үшін пайдаланылған немесе егер бұларды пайдалану 6 айдан астам уақытқа созылса, әйтпесе, мұндай қызметтер 6 айдан астам уақыт бойы көрсетілсе; 4. Осы баптың осының алдындағы ережелеріне қарамастан "тұрақты мекеме (өкілдік)" термині мыналарды қамтымайды: а) ғимараттарды кәсіпорынға тиесілі тауарларды немесе бұйымдарды сақтау, көрсету немесе жіберіп тұру мақсаттары үшін ғана пайдалану; б) осы кәсіпорынға тиесілі тауарлар немесе бұйымдар қорын сақтау, көрсету немесе жіберіп тұру мақсаттары үшін ғана ұстау; с) кәсіпорынға тиесілі тауарлар немесе бұйымдар қорын өзге кәсіпорынның ұқсату мақсаттары үшін ғана ұстау; д) тұрақты қызмет орнын тауарлар немесе бұйымдар сатып алу мақсаттары үшін ғана немесе кәсіпорынға арналған ақпарат жинау үшін ғана ұстау; е) тұрақты қызмет орнын кәсіпорын үшін дайындық немесе көмекші сипаттағы кез-келген басқа қызметпен айналысу мақсаттары үшін ғана ұстау; ф) тұрақты қызмет орнының а) тармақшасынан е) тармақшасына дейін санамалап көрсетілген амал нәтижесінде туындаған жиынтық қызметі дайындық немесе көмекші сипатта болған жағдайда тұрақты қызмет орнын қызмет түрлерінің кез-келген осындай амалын жүзеге асыру үшін ғана ұстау. 5. Осы баптың 1 және 2-тармақтарының ережелеріне қарамастан, егер осы баптың 7-тармағында айтылған тәуелсіз мәртебесі бар агенттен өзге тұлға Уағдаласушы мемлекеттің бірінде басқа Уағдаласушы Мемлекеттің кәсіпорны атынан әрекет етсе және бірінші уағдаласушы Мемлекетте келісім шарттар жасауға өкілеттігі болса, әрі оны әдетте пайдаланып жүрсе немесе кәсіпорынға тиесілі тауарлар мен бұйымдар қорын сақтап отырса, олардан кәсіпорын атынан одан әрі өткізу мақсатында осы тауарлар мен бұйымдар ұдайы жіберіліп тұрса, онда бұл кәсіпорын осы тұлға кәсіпорын үшін жүзеге асырып отырған кез-келген қызметке қатысты бірінші Уағдаласушы Мемлекетте тұрақты мекемесі (өкілдігі) бар кәсіпорын болып есептеледі, осындай тұлғаның қызметі осы баптың 4-тармағында ескертілген қызмет түрлерімен шектелетін жағдай бұған қосылмайды. 6. Кәсіпорын кәсіпкерлік қызметін басқа Уағдаласушы Мемлекетте делдал, комиссионер немесе тәуелсіз мәртебесі бар кез-келген басқа агент арқылы жүзеге асырғаны үшін ғана, осындай тұлғалар өздерінің әдеттегі қызметі шеңберінде әрекет еткен жағдайда, сол Уағдаласушы Мемлекетте тұрақты мекемесі (өкілдігі) бар кәсіпорын ретінде қарастырылмайды. 7. Уағдаласушы Мемлекеттің резиденті болып табылатын компанияның басқа Уағдаласушы Мемлекеттің резиденті болып табылатын компанияны бақылаушы немесе оның бақылауында болуы яки осы басқа Мемлекетте кәсіпкерлік қызметпен айналысуы (не тұрақты мекеме (өкілдік) арқылы немесе басқадай жолмен) фактісінің өзі-ақ осы компаниялардың бірін екіншісінің тұрақты мекемесіне (өкілдігіне) айналдырмайды. 8. Басқа Уағдаласушы Мемлекеттің резиденті болып табылатын компаниялар бақылау жасайтын кәсіпорындар осы өзге мемлекетте (тұрақты мекемесі (өкілдігі) арқылы) бұл компанияларды басқа тұрақты мекемеге айналдыра алмайды.