Тармақ 1. Уағдаласушы Мемлекетте пайда болатын және басқа Уағдаласушы Мемлекеттiң резидентiне төленетiн проценттерге осы басқа Мемлекетте салық салынуы мүмкiн. 2. Алайда мұндай проценттерге сондай-ақ олар пайда болатын Уағдаласушы Мемлекеттiң заңдарына сәйкес осы Мемлекетте де салық салынуы мүмкiн, бiрақ егер проценттер алушы оның нақты иесi болса, онда осылайша алынатын салық проценттердiң жалпы сомасының 10 процентiнен аспайтын болады. 3. 2-тармақтың ережелерiне қарамастан, егер проценттердi алушы оның нақты иесi болса және мына шарттардың бiрi орындалса: а) мұндай алушы Уағдаласушы Мемлекет, оның саяси-әкiмшілік бөлiмшелерiнiң немесе жергiлiктi үкiмет органдарының бiрi немесе көпшiлiк құқық секторына қатысы бар заңды тұлғалары болып табылса; соның iшiнде осы Мемлекеттiң орталық банкiн қоса алғанда, немесе мұндай проценттi осы Мемлекеттердiң, бөлiмшелердiң, өкiмет органдарының немесе көпшiлiк құқық секторына қатысы бар заңды тұлғалардың бiрi төлесе; немесе б) мұндай проценттер кез келген борыш талабына немесе Қазақстан жағдайында СОҒАСЕ не Франция жағдайында осыған ұқсас ұйым кепiлдiк берген яки сақтандырған кредитке қатысты төленсе, кез келген мұндай процентке, 1-тармақта ескертiлгенiндей, проценттер алушы резидентi болып табылатын Уағдаласушы Мемлекетте ғана салық салынуы тиiс. 4. "Проценттер" терминi осы Бапта пайдаланғанда кепiлмен қамтамасыз етiлген немесе қамтамасыз етiлмеген және борышқордың пайдаларына қатысуға құқық беретiн немесе бермейтiн кез келген түрдегi борыш талаптарынан алынған табысты және, атап айтқанда, үкiметтiң бағалы қағаздарынан алынған табыс пен облигациялардан немесе борыш мiндеттемелерiнен алынған табысты, соның iшiнде осы бағалы қағаздар, облигациялар немесе борыш мiндеттемелерi бойынша алынған сыйақылар мен ұтыстарды бiлдiредi. Уақытылы төленбеген төлемдер үшiн айыппұлдар осы Баптың мақсаттары үшiн проценттер ретiнде қарастырылмайды. "Проценттер" терминi 10-Баптың ережелерi бойынша дивидендтер ретiнде қарастырылатын кез келген табыс түрлерiн қамтымайды. 5. Егер проценттердiң нақты иесi Уағдаласушы Мемлекеттiң резидентi бола отырып, проценттер пайда болатын басқа Уағдаласушы Мемлекетте сонда орналасқан тұрақты мекеме арқылы кәсiпкерлiк қызметпен айналысса немесе осы басқа Мемлекетте сонда орналасқан тұрақты базадан тәуелсiз жеке қызметтер көрсетсе, ал төленетiн проценттерге қатысты борыш мiндеттемесi шын мәнiнде осындай тұрақты мекемеге немесе тұрақты базаға қатысты болса, 1, 2 және 3-тармақтардың ережелерi қолданылмайды. Мұндай жағдайда ретiне қарай 7-Баптың немесе 14-Баптың ережелерi қолданылады. 6. Егер проценттер төлеушi Уағдаласушы Мемлекеттiң өзi, саяси-әкiмшiлiк бөлiмшесi, жергiлiктi өкiмет органы немесе осы Мемлекеттiң резидентi болса, олар осы Мемлекетте пайда болған деп есептеледi. Алайда егер проценттер төлеушi тұлға Уағдаласушы Мемлекеттiң резидентi ме, жоқ па осыған қарамастан Уағдаласушы Мемлекетте тұрақты мекемесi немесе тұрақты базасы болса, соларға байланысты проценттер төленетiн қарыз туындаса және мұндай проценттердi осы тұрақты мекеме немесе тұрақты база төлейтiн болса, онда проценттер тұрақты мекеме немесе тұрақты база орналасқан Мемлекетте пайда болған деп есептеледi. 7. Егер проценттер төлеушi мен оның нақты иесi арасындағы немесе сол екеуi мен қандай да болсын басқа бiр тұлға арасындағы арнайы қатынастарға байланысты борыш талабына қатысты және соның негiзiнде төленетiн проценттер сомасы осындай қатынастар болмай тұрғанда проценттер төлеуші мен олардың нақты иесi арасында келiсiлуi мүмкін сомадан асып кетсе, онда осы Баптың ережелерi тек соңғы аталған сомаға ғана қолданылады. Бұл жағдайда төлемнiң басы артық бөлiгiне осы Конвенцияның басқа ережелерiн тиiсiнше ескере отырып, әрбiр Уағдаласушы Мемлекеттiң заңдарына сәйкес салық салынады. 8. Егер төленiп отырған проценттерге қатысты борыш талабы негiзiнен осы Баптан артықшылық алу мақсаты үшiн жасалса немесе соған берiлген болса, осы Баптың ережелерi қолданылмайды.