Тармақ 1. Осы Конвенцияның мақсаттары үшiн "Уағдаласушы Мемлекеттің резидентi" терминi осы Мемлекеттiң заңдары бойынша онда өзiнің тұрғылықты жерiне, резиденттiгiне, басқару орнына, құрылған орнына немесе осындай сипаттағы кез келген басқа өлшемге байланысты салық салынатын кез келген тұлғаны бiлдiредi. Термин сондай-ақ Уағдаласушы Мемлекеттi, оның саяси-әкiмшiлiк бөлiмшелерiн және жергiліктi өкiмет органын және олардың көпшiлiк құқық секторына қатысы бар заңды тұлғаларын қамтиды. Алайда бұл термин тек осы Мемлекеттегi көздерден алынатын табысқа қатысты немесе сонда орналасқан мүлiкке қатысты осы Мемлекетте салық салынуға тиiс кез келген тұлғаны қамтымайды. 2. 1-тармақтың ережелеріне сәйкес жеке тұлға Уағдаласушы Мемлекеттердің екеуiнің де резидентi болған жағдайда, оның мәртебесi былай айқындалады: а) ол өзiнiң қарамағына жататын тұрақты баспанасы бар Мемлекеттің резиденті болып есептеледi; егер оның Мемлекеттердiң екеуiнде де тұрақты баспанасы болса, ол неғұрлым тығыз жеке және экономикалық байланыстары (өмiрлiк мүдделер орталығы) бар Мемлекеттің резиденті болып есептеледi; b) егер оның өмiрлiк мүдделер орталығы бар Мемлекеттi айқындау мүмкін болмаса немесе оның Мемлекеттердің бiрде-бiреуiнде тұрақты баспанасы болмаса, ол өзi әдетте тұрып жатқан Мемлекеттің резидентi болып есептеледі; с) егер ол әдетте Мемлекеттердiң екеуiнде де мекендейтiн болса немесе олардың біреуінде де тұрмаса, ол өзі азаматы болып табылатын Уағдаласушы Мемлекеттiң резидентi болып есептеледi; д) егер ол Мемлекеттердiң екеуiнiң де азаматы болса немесе біреуінің де азаматы болмаса, Уағдаласушы Мемлекеттердiң құзыреттi органдары мәселенi өзара келiсе отырып шешедi. 3. Егер 1-тармақтың ережелерiне сәйкес жеке тұлғадан өзге тұлға Уағдаласушы Мемлекеттердiң екеуiнiң де резидентi болса, онда ол өзiнiң тиімдi басқару орны орналасқан Мемлекеттiк резидентi болып есептеледi. Егер тұлғаның тиiмдi басқару орны қайда орналасқанын айқындау мүмкiн болмаса, Уағдаласушы Мемлекеттердiң құзыреттi органдары мұндай тұлғаның тиімді басқару орны қайда орналасқаны жайында келiсiмге келуге ұмтылады. Тұлға осы Конвенцияның мақсаттары үшiн Уағдаласушы Мемлекеттердің құзыретті органдары арасындағы келiсiлген тиiмдi басқару орны орналасқан Мемлекеттің резидентi болып есептеледi. Алайда егер осындай құзыреттi органдар келiсiмге келе алмаса, онда осы Конвенцияны қолдану мақсаттары үшін бұл тұлға Уағдаласушы Мемлекеттердiң ешқайсысының резидентi болып есептелмейдi.