Бап 41 О товарных знаках, знаках обслуживания, географических указаниях и наименованиях мест происхождения товаров

Тармақ 1. Апелляциялық кеңес уәкiлеттi органның жанындағы, өтініш берушілердің қарсылықтарын сотқа дейiн қарау жөніндегі алқалы орган болып табылады.

Тармақ 2. Апелляциялық кеңеске:

• 1) сараптама ұйымының тауар белгісін тіркеуден бас тарту, оның ішінде Мадрид келісіміне хаттаманың 5-бабының 1 және 2-тармақтарына сәйкес мәлімделген тауар белгісіне құқықтық қорғауды беруден бас тарту туралы шешімдеріне;
• 2) сараптама ұйымының географиялық нұсқаманы және тауар шығарылған жердің атауын пайдалану құқығын тіркеуден және (немесе) беруден бас тарту туралы шешімдеріне;
• 3) тауар белгісін, оның ішінде Мадрид келісіміне хаттаманың 5-бабының 6-тармағына сәйкес тіркеуге;
• 4) географиялық нұсқаманы және тауар шығарылған жердің атауын пайдалану құқығын тіркеуге және (немесе) беруге қарсылықтар берілуі мүмкін.
• 5) Көрсетілген қарсылықтарды сотқа дейін қарау міндетті болып табылады.

Тармақ 3. Апелляциялық кеңестің құрамына кәсіпкерлік жөніндегі және тауар белгілерін, географиялық нұсқамаларды және тауарлар шығарылған жерлердің атауларын қорғау саласындағы уәкілетті органдардың өкілдерін қоса алғанда, мүшелердің тақ саны (кемінде бесеуі) кіруге тиіс.

Тармақ 4. Апелляциялық кеңестің құрамына мыналар кіре алмайды:

• 1) патенттік сенім білдірілген өкілдер;
• 2) жұбайлары, жақын туыстары немесе жекжаттары;
• 3) сараптама ұйымының қызметкерлері.

Тармақ 5. Апелляциялық кеңестің кез келген мүшесі:

• 1) осы баптың 4-тармағының негізінде апелляциялық кеңестің отырысына қатысушылар мәлімдеген өздігінен бас тарту немесе қарсылық білдіру жағдайында;
• 2) еңбекке уақытша жарамсыздығына, демалыста немесе іссапарда болуына байланысты болмаған жағдайда ауыстырылуы мүмкін.

Тармақ 6. Апелляциялық кеңестің әрбір отырысы уәкілетті орган айқындайтын тәртіппен бейнетүсіру қолданылып жүргізіледі.