Ресей Федерациясы Полигонның объектілерін және Приозерск қаласының жылжымалы және тұрақты мүлкін пайдалану кезінде: - аталған объектілер инфрақұрылымын қалпына келтіруді және ұстауды; - Тараптардың қару-жарағы және әскери техникасы үлгілерін сынауды белгіленген шекараларда өткізуді; - жүргізілетін жұмыстар қауіпсіздігі мен Полигон аумағында ракеталар ұшыруды қамтамасыз етуді; - Ресей Федерациясы Қорғаныс министрлігінің келісуімен Қазақстан Республикасы Қорғаныс министрлігінің мүддесі үшін сынақ және ұрыс алаңдарын ұрыс атыстарын орындау үшін пайдалануды; - аталған объектілердің ғылыми-техникалық сынақ кешені мен инфрақұрылымын сақтауды және оларды жұмыс бабында ұстауды; - ракеталар мен нысаналар қалдықтарын іздеуді, көшіруді және пайдалануды, ұрыс алаңдарын уақытылы тазалауды; - апаттар салдарын уақытылы жоюды және мөлшері Тараптардың комиссиясымен анықталатын, Қазақстан Республикасына келтірілген зиянның орнын толтыруды; - Полигон шеңберінде экологиялық жағдайды табиғатты қорғаудың ұзақ мерзімді бағдарламасын жасау, бекіту және іске асыру жолымен қалпына келтіруді қамтамасыз етуді міндеттенеді. Полигон басшылығы жергілікті өкілетті және басқару органдары басшыларымен бірлесе Полигон аумағын мерзімді ауылшаруашылық жұмыстары кезінде пайдалану тәртібін анықтайды. Полигонның ішкі байланыс жүйелерін, автомобиль және темір жолдарын, жылжымалы составтар мен су көліктерін пайдалану және ұстау осы құралдарды пайдаланатын Полигонның әскери құрамаларымен жүзеге асырылады.