Тармақ 1. Қазақстан Республикасының Үкiметi қарыздар туралы тиiстi келiсiмдердiң шарттарына және қарарлардың, тиiстi келiсiмдер баптарының, құру туралы келiсiмдердiң, құру туралы келiсiмнің, конвенциялардың немесе Құрылтай шартының Қазақстан Республикасының ХҚДБ-ға, ХҚК-ға, ХДҚ-ға, ИККА-ға, ЕҚДБ-ға, АДБ-ға, ИДБ-ға, АИИБ-ға, ТИҚ-қа мүшелiгiне қатысты ережелерiне сәйкес Қазақстан Республикасының Қаржы министрлiгi арқылы қарыздар тартуға, қаржыландырудың басқа да нысандарын пайдалануға және Қазақстан Республикасының атынан осы халықаралық ұйымдарға сомалар төлеп отыруды қамтамасыз етуге уәкiлеттi.
Тармақ 2. Қазақстан Республикасының Қаржы министрлiгi ХҚДБ, ХҚК, ХДҚ, АИИБ келiсiмдерiнiң баптарына, ЕҚДБ-ны, АДБ-ны құру туралы келiсiмдерге және ИККА-ны құру туралы конвенцияға сәйкес Қазақстан Республикасының ХҚДБ-ға, ХҚК-ға, ХДҚ-ға, ИККА-ға, ЕҚДБ-ға, АДБ-ға, АИИБ-ға мүшелiгiне қажет болуы немесе сай келуi мүмкiн, басқаға берiлмейтiн сыйақысыз борыштық мiндеттемелердiң кез келгенін шығаруға уәкiлеттi.
Тармақ 3. Қазақстан Республикасының Ұлттық Банкi ХВҚ қаражатын оны сатып алу түрiнде тартуға, сондай-ақ Қазақстан Республикасының ХВҚ мүшелiгiне қатысты қарарлардың және ХВҚ Келiсiмi баптарының шарттары мен ережелерiне сәйкес Қазақстан Республикасының атынан ХВҚ-ға сомалар төлеп отыруды қамтамасыз етуге, сондай-ақ Қазақстан Республикасының ХВҚ Қарыз алу арнаулы құқықтары департаментiнiң қызметiне қатысуына байланысты төлемдердi жүзеге асыруға уәкілетті. Қазақстан Республикасының Ұлттық Банкi Қазақстан Республикасының Үкiметiмен келiсе отырып басқа халықаралық ұйымдардан заемдар тартуға, заемдар тартудың қаржылық шарттарын айқындауға және осындай заемдар бойынша келiсiмдердi дербес жасасуға құқылы.
Тармақ 4. Қазақстан Республикасының Ұлттық Банкi ХВҚ Келiсiмiнiң баптарына сәйкес Қазақстан Республикасының ХВҚ-ға мүшелiгiне қажет болуы немесе сай келуi мүмкiн басқаға берiлмейтiн сыйақысыз борыштық мiндеттемелердiң кез келгенiн шығаруға уәкiлеттi.