Шарттың XVIII бабы алынып тасталады және мыналармен ауыстырылады:
Тармақ 1. Құрлықтық аумағы Атлант мұхитынан Орал тауына дейiнгi географиялық аудан шегiндегi Еуропада орналасқан, Еуропадағы қауiпсiздiк пен ынтымақтастық жөнiндегi ұйымның кез келген Қатысушы мемлекетi осы Шартқа қосылу туралы депозитарийге жазбаша өтiнiш жiбере алады. 2. Өтiнiш бiлдiрушi Мемлекет өз өтiнiшiне мынадай ақпараттарды: (А) өзінің қолында бар кәдiмгi қару-жарағы мен техникасының түрлерiн белгiлейдi; (В) өздерiнің белгiленетiн ұлттық және аумақтық деңгейлерiн және Шартпен шектелетiн қару-жарақ пен техниканың әрбiр санаты үшiн соларға байланысты шектi кiшi деңгейлерiн; және (С) өтiнiш бiлдiрушi мемлекет орынды деп есептеген кез келген басқа ақпаратты қамтиды. 3. Депозитарий осындай өтiнiш бiлдiрушi мемлекеттiң ұсынған өтiнiшi мен ақпаратының келiп түскендiгi туралы барлық басқа Қатысушы мемлекеттердi хабардар етедi. 4. Өтiнiш бiлдiрген мемлекет көрсетiлген ақпаратты өзгерте немесе толықтыра алады. Кез келген Қатысушы мемлекет қосымша ақпарат сұрата алады. 5. Қатысушы мемлекеттер осы баптың 3-тармағына сәйкес хабарланғаннан кейiн 21 күннен кешiктiрмей бастайтын, сонда Қатысушы мемлекеттердің өтiнiштерi қаралатын, келiссөздер жүргiзетiн және қосылудың шарттарын белгiлейтiн Бiрлескен консультациялық топтың мәжiлiсiн өткiзедi. Қатысушы мемлекеттердің шешiмi бойынша өтiнiш білдiрген мемлекет Бiрлескен консультациялық топтың мәжiлiсiне шақырылатын болады. 6. Қатысушы мемлекеттер әрбiр өтiнiштi жедел жағдайда жеке негiзде қарайды. Кез келген шешiм өзара бәтуамен қабылданады. 7. Депозитарий барлық Қатысушы мемлекеттерге және өтiнiш білдiрген мемлекетке жiберiлетiн және депозитарийдiң мұрағатына сақтауға тапсырылатын Қатысушы мемлекеттер мен өтiнiш бiлдiрген мемлекет арасындағы қосылу туралы шартта қосылудың келiсiлген шарттары бекiтiледi. 8. Қосылу туралы келiсiмдi барлық Қатысушы мемлекеттердiң бекiткендiгi расталғанын алған соң депозитарий бұл туралы барлық Қатысушы мемлекеттерге және өтiнiш бiлдiрген мемлекетке хабарлайды. Бұдан кейiн өтiнiш бiлдiрген мемлекет оның кеңес беру рәсiмдерiне сәйкес бекiткен жағдайда Қосылу туралы келiсiмнiң ережелерi мен шарттарын мойындайтыны туралы құжатты ұсына алады. 9. Осы Шарт өтiнiш бiлдiрген мемлекет үшiн олардың Шартқа қосылу туралы өздерiнің құжаттарын депозитарийдiң сақтауына тапсырған соң он күннен кейiн күшiне енедi; осы сәттен бастап өтiнiш бiлдiрген мемлекет Шарттың Қатысушы мемлекетi болады".