Банк халықаралық ұйым - халықаралық құқық субъектiсi болып табылады, халықаралық құқықтық қабiлетке ие және атап айтқанда, Банктiң Жарғысына сәйкес өз құзыретi шегiнде халықаралық шарттар жасасуға құқығы бар. Банк Қазақстан Республикасының аумағындағы заңды тұлғаның құқықтарын пайдаланады және атап айтқанда, мыналарға: Банктiң Жарғысында белгiленген өз құзыретi шегiнде кез келген мәмiлелер жасасуға; жылжымалы және жылжымайтын мүлiктi жалға алуға, сатып алуға және иелiктен айыруға, сондай-ақ көрсетiлген мүлiкке өзге де тәсiлмен билiк етуге; сот және төрелiк органдарда сөз сөйлеуге құқылы. Қазақстан Республикасының заңнамасында заңды тұлғаларға өз мүдделерiн қорғау үшiн қандай iс жүргiзу құқықтары бекiтiлген болса, дәл сондай Банкке де танылады; Банкке Жарғыға сәйкес жүктелген мiндеттердi орындауға бағытталған басқа да iс-қимылдар жасауға құқылы. Қазақстан Республикасының аумағында Банктiң қызметi қолданылатын халықаралық шарттарда, Келiсiмде, Жарғыда және осы Келiсiмде, ал олар болмаған жағдайда не көрсетiлген құжаттармен реттелмеген бөлiгiнде Қазақстан Республикасының заңнамасында айқындалады. Банктiң жарғылық функцияларды жүзеге асыруға байланысты қызметi Қазақстан Республикасы уәкiлеттi органдарының тарапынан лицензиялауға, реттеуге және бақылауға жатпайды. Егер жүзеге асырылатын қызмет түрлерi немесе операциялар мен мәмiлелер Қазақстан Республикасының заңнамасына сәйкес Банк мәртебесiнiң болуын талап ететiн жағдайда, Банк мұндай қызмет түрлерiне немесе операциялар мен мәмілелерге қолдануға байланысты Банк мәртебесiне ие деп қаралатын болады. Үкiметпен келiсiм бойынша Банк филиалдар және/немесе өкiлдiктер ашуға, сондай-ақ Қазақстан Республикасының аумағында еншiлес банктер мен ұйымдар құруға құқылы.