Қазақстан Республикасының аумағында орналасқан Банктiң мүлкi мен активтерiнiң Банкке қатысты түпкiлiктi сот шешiмi шығарылғанға дейiн тiнтуге, реквизициялауға, тыйым салуға, тәркiлеуге, экспроприациялауға немесе алудың немесе иелiктен шығарудың кез келген өзге де нысанына қарсы иммунитетi бар. Банктiң мақсатына қол жеткiзу және функцияларын орындау үшiн қажеттi дәрежеде және Жарғының ережелерiн ескере отырып, Банктiң барлық мүлкi мен активтерi қандай да болмасын шектеулерден, нұсқамалардан және мораторийлерден босатылады. Өз өкiлеттiктерiн жүзеге асырудың салдары болып табылмайтын немесе осы өкiлеттiктердi жүзеге асыруға байланысты емес жағдайларды қоспағанда, Банктiң кез келген сот қудалауына қарсы иммунитетi болады. Банкке қарсы талап арыздар Банк орналасқан не филиалы, еншiлес банкi, еншiлес ұйымы немесе өкiлдiгi бар, не соттың шақыру қағазын немесе процесс туралы хабарлама қабылдау мақсатында агент тағайындаған, не бағалы қағаздар шығарған немесе оларға кепiлдiк берген мемлекеттiң аумағындағы құзыреттi соттарда ғана қозғалады. Банктiң мұрағаттарына, мүлкiне, сондай-ақ оған тиесiлi немесе иесi болып табылатын кез келген ақпаратқа Қазақстан Республикасының аумағында қол сұғылмайды.