Yкiмет Банкке оның ресми байланысы үшiн почталық жөнелтiмдерге, каблограммаларға, телеграммаларға, радиограммаларға, телефонға, интернетке және басқа байланыс құралдарына басымдыққа, тарифтерге және ставкаларға қатысты, сондай-ақ баспасөз және радио арқылы таратылатын ақпаратқа арналған төмендетiлген ставкаларға қатысты кез келген басқа халықаралық ұйымға немесе дипломатиялық өкiлдiкке көрсетiлетiн қолайлы жағдайлардан кем емес жағдай жасауға кепiлдiк бередi. Көрсетiлген қызметтерге ақы төлеу жөнiндегi барлық шығыстар Банк қаражаты есебiнен жүргiзiледi. Банкке келiп түсетiн және одан шығатын барлық қызметтiк хабарламалар, оларды жiберу тәсiлi мен нысанына қарамастан, цензураға және кез келген басқа бақылауға, жол-жөнекей ұстап алу немесе араласу нысанына жатпайды. Лауазымды тұлғалар кодты пайдалана алады және курьерлiк немесе дипломатиялық почта арқылы құжаттар мен хат-хабарларды ала алады. Банк сымсыз таратқышты орнатуды және пайдалануды Үкiметтiң келiсiмiмен ғана жүзеге асыра алады. Банк Yкiметтiң келiсiмiмен екi нүкте арасында алысқа арналған байланыс құралдарын және Қазақстан Республикасының аумағында және одан тыс жерлерде Банктi байланыспен қамтамасыз етуге жәрдем ету үшiн қажеттi хабарлама қабылдау мен жiберудiң басқа құралдарын орната әрi пайдалана алады.