Өкілетті өкілдер, олар кадрында тұрған Тараптардың құзыретті органдарының ұсынысы бойынша Орталыққа іс-сапарға жіберіледі. Өкілетті өкілдің жұмыс істеу мерзімі мен тәртібі жіберуші мемлекеттің заңнамасына сәйкес белгіленеді. 22. Орталыққа жіберілетін өкілетті өкіл мынадай талаптарға сәйкес келуі тиіс: құзыретті органдардың жедел бөлімшелерінде кемінде 10 жыл кәсіби жұмыс тәжірибесінің болуы; құзыретті органның орталық аппаратындағы басшы лауазымдарда жұмыс тәжірибесінің болуы; талдау жұмысы дағдыларының болуы; жұмысты ұйымдастырудың қазіргі заманғы техникалық құралдарымен, оның ішінде компьютерлік жүйелермен жұмыс істеу дағдыларының болуы; Орталықтың ресми тілін меңгеруі; құпия ақпаратпен жұмыс істеуге рұқсатының болуы. 23. Орталықтағы өз қызметінде өкілетті өкіл мыналарға міндетті: жіберуші мемлекеттің құзыретті органдарының мүддесін білдіруге; Орталық пен жіберуші мемлекеттің құзыретті органдары арасында ақпарат алмасуды қамтамасыз етуге; басқа қатысушы-мемлекеттердің өкілетті өкілдерімен өзара іс-қимылды жүзеге асыруға; Орталықта алынған және өкілетті өкілдерден алынған ақпаратты бағалауға және оны жіберуші мемлекеттің құзыретті органдарына беруге; Орталықтың сұрау салуы бойынша жіберуші мемлекеттен немесе басқа да қатысушы-мемлекеттердің өкілетті өкілдерінен алынған ақпаратты талдауға қатысуға; Орталыққа және ұлттық заңнаманың ережесіне қатысты басқа да қатысушы-мемлекеттердің өкілетті өкілдеріне кеңес беруге; қатысушы-мемлекеттердің құзыретті органдары, ұлттық құзыретті органдары және Орталық арасындағы ынтымақтастық пен өзара іс-қимылды дамытуға жәрдемдесуге; бақыланатын жеткізулерді қоса алғанда, келісілген бірлескен халықаралық операциялар, жедел-іздестіру іс-шараларын ұйымдастыруға және өткізуге жәрдемдесуге; жіберуші қатысушы-мемлекеттегі есірткі жағдайының дамуы туралы Орталыққа және қатысушы-мемлекеттердің өкілетті өкілдеріне ақпарат беруге; қатысушы-мемлекеттердің заңнамаларын үйлестіру жөнінде ұсыныстар әзірлеуге; ОАӨАҮО-ның ОДБ толықтыруға қатысуға. 24. Орталық өкілетті өкілге олар өздерінің міндеттерін орындау кезінде қолдау көрсетеді, оның ішінде: өкілетті өкілдің сұрау салуларын уақытылы қарайды және басқа да қажетті жәрдем көрсетеді; жабдықталған үй-жайды беруді қоса алғанда, өкілетті өкілдің тиімді қызметін қамтамасыз етеді; өкілетті өкілдің қызметі барысында туындайтын мәселелерді уақытылы шешеді. 25. Өкілетті өкіл: Орталық директорының жетекшілік ететін орынбасарымен өзінің жұмысын үйлестіреді; Орталықтың ішкі ережесін сақтайды; Орталықтың алдында тұрған мақсаттар мен міндеттерге қол жеткізуге күш-жігерін қосады; өзінің қызметі туралы Орталықтың басшылығына ай сайын ақпарат береді. 26. Өкілетті өкіл өзіне жүктелген міндеттерді орындамаған немесе тиісінше орындамаған жағдайда, Директор жіберуші мемлекеттің құзыретті органының атына оны мерзімінен бұрын шақыртып алу туралы ұсыныс жіберуге құқылы. 27. Өкілетті өкіл берілген рұқсат және орындалатын міндеттер деңгейіне сәйкес келетін дәрежеде ОАӨАҮО-ның ОДБ пайдалануға құқығы бар. 28. Өкілетті өкілге жыл сайынғы және басқа да демалыстарды Орталық басшылығының келісімі бойынша оның баянатының негізінде жіберуші мемлекеттің ұлттық құзыретті органы береді. 29. Өкілетті өкіл ұлттық даталар бөлігінде ұлттық заңнамаға сүйенеді және Орталыққа өз мемлекетінің құзыретті органы растаған ұлттық даталардың тізімін ұсынады.