Тармақ 1. Демпингке қарсы немесе өтемақы тергеулерді бастау туралы шешім қабылдағаннан кейін тергеу жүргізетін орган өзіне белгілі экспорттаушыларға және (немесе) тергеу объектісі болып табылатын тауарды өндірушілерге жауап берулері тиіс сұрақтардың тізбесін жібереді.
Тармақ 2. Сұрақтар тізбесі жіберілген тауарды экспорттаушылар және (немесе) өндірушілер аталған тізбені алған күннен бастап күнтізбелік 30 күн ішінде тергеу жүргізетін органға өз жауаптарын беруге міндетті.
Тармақ 3. Сұрақтар тізбесі пошта арқылы жіберілген күннен бастап күнтізбелік 7 күннен кейін немесе экспорттаушының және (немесе) өндірушінің өкіліне тікелей тапсырылған күннен бастап алынды деп саналады.
Тармақ 4. Тергеу жүргізетін орган тергеу барысында мүдделі тұлғалар ұсынған ақпараттың дәлдігіне және шынайы болуына көз жеткізеді.
Тармақ 5. Тергеу барысында берілген мәліметтерді немесе жүргізілетін тергеумен байланысты алынған қосымша мәліметтерді тексеру мақсатында тергеу жүргізетін орган өз өкілдерін мүдделі тұлғалардың тұратын жерлеріне жіберуге, ақпараттар жинауды, мүдделі тұлғалармен консультациялар мен келіссөздер жүргізуге, тауардың үлгілерімен танысуға және тергеу жүргізу үшін қажетті өзге әрекеттерді қолдануға құқылы.
Тармақ 6. Тараптар мемлекеттерінің мемлекеттік билік (басқару) органдары тиісті сұраулар бойынша тергеу жүргізетін органға тергеуді жүргізу мақсаттары үшін қажетті осы Келісімде көзделген ақпаратты ұсынуға міндетті.