Тармақ 1. Сертификат ағылшын немесе орыс тілдерінде басылған түрінде, қорғаныш торкөзі немесе қорғаныш түсті жиегі бар, типографиялық тәсілмен әзірленген тығыздығы 25 г/м2 кем емес А4 форматты (210x297 мм) қағазда ресімделеді. 2. СТ-2 нысанындағы сертификат көшірмесі, сондай-ақ онымен байланысты тауарлардың шыққан жерін растайтын кез келген құжаттар сертификат берген уәкілетті органда 3 жылдан кем емес мерзім сақталады. 3. Сертификатта адамдардың қол қоюының факсимилесін пайдалануға, қандай да бір тазартулар, түзетулер және (немесе) сертификатты куәландырушы органмен куәландырылмаған толықтырулардың болуына жол берілмейді. 4. Сертификатқа енгізілетін түзетулер және (немесе) толықтырулар қате ақпаратты сызып тастау және түзетілген мәліметтерді басу жолымен немесе қолмен енгізу арқылы жүргізіледі, олар сертификатты беруге және куәландыруға уәкілетті органның мөрімен және өкілетті тұлғаның қолымен куәландырылады. 5. Сертификатты толтыру келесі талаптарға жауап беруі тиіс: 1-баған «Жүкті жөнелтуші (экспорттаушы) (атауы және мекенжайы)». Бағанды толтыру кезінде мемлекеттік тіркеу туралы куәлікке не жүкті жөнелтуші (экспорттаушының) нақты мекенжайын растайтын құжатқа сәйкес жүкті жөнелтуші (экспорттаушының) атауын көрсетуге жол беріледі. СТ-2 нысанындағы сертификаттың 1 және 2-бағандарында жүкті түсірумен байланысты басқа да тауарға ілеспе құжаттардағы (сыртқы сауда шарты (мәмілесі), шот-фактура, кеден декларациясы және т.б.) атаулармен бірдей жүкті жөнелтуші (экспорттаушының) және жүкті алушы (импорттаушының) атаулары мен мекенжайлары көрсетіледі. Жүкті жөнелтуші және экспорттаушы әртүрлі заңды тұлға болған жағдайда, жүкті жөнелтуші (атауы және мекенжайы) экспорттаушының (атауы және мекенжайы) «тапсырмасы бойынша» әрекет ететіндігін көрсету керек; 2-баған «Жүкті алушы (импорттаушы) (атауы және мекенжайы)». Бағанды толтыру кезінде мемлекеттік тіркеу туралы куәлікке не жүкті алушы (импорттаушының) нақты мекенжайын растайтын құжатқа сәйкес жүкті алушы (импорттаушының) атауын көрсетуге жол беріледі. СТ-2 нысанындағы сертификаттың 1 және 2-бағандарында жүкті түсірумен байланысты басқа да тауарға ілеспе құжаттардағы (сыртқы сауда шарты (мәмілесі), шот-фактура, кеден декларациясы және т.б.) атаулармен бірдей жүкті жөнелтуші (экспорттаушының) және жүкті алушы (импорттаушының) атаулары мен мекенжайлары көрсетіледі. Жүкті алушы және импорттаушы әртүрлі заңды тұлға болған жағдайда, жүкті алушы (атауы және мекенжайы) импорттаушының (атауы және мекенжайы) «тапсырмасы бойынша» әрекет ететіндігін көрсету керек; 3-баған - «Көлік құралдары мен тасымалдау бағыты (белгілі болғанына қарай)». Көлік құралдары мен тасымалдау бағыты белгілі болғанына қарай көрсетіледі. 4-баған - сертификаттың тіркеу нөмірі, сертификатты берген ел, бұл сертификат қандай елге арналғаны көрсетіледі. Тіркеу нөмірін қолмен жазып енгізуге немесе мөртабан қоюға жол беріледі. 5-баған - «Қызметтік белгілер үшін». Тауарды әкету, оның транзиті және (немесе) тауарды алу елдерінің мемлекеттік бақылаушы органдарының қызметтік белгілері, сонымен қатар қажет жағдайда «Телнұсқа», «Сертификаттың орнына берілді», «Кейіннен берілді» деген жазбалар және осы Хаттамамен көзделген басқа да жазбалар қолмен жазылып, басылады немесе мөртабан қойылады. Осы бағанға қолмен жазылып енгізілетін жазбалар осы баптың 4-тармағымен қаралған тәртіпте куәландырылады. 6-баған - «Нөмірі». Тауардың реттік нөмірі көрсетіледі; 7-баған - «Орындар саны және орама түрі». Орындар саны және орама түрі көрсетіледі; 8-баған - «Тауардың сипаты». Кедендік ресімдеу мақсаты үшін өтініш берілген тауарды біркелкі бірдейлендіруге мүмкіндік беретін тауардың коммерциялық атауы және басқа да деректер көрсетіледі. 8-бағанды толтыру үшін орын жеткіліксіз болған жағдайда, белгіленген тәртіпте толтырылатын (сертификаттың 4-бағанында көрсетілгеніндей бірдей тіркеу нөмірі бар, қол қоюмен және мөрмен куәландырылған) тауардың шыққан жері туралы қосымша парақты (парақтарды) пайдалануға (қосымша парақ бланкі осы Хаттаманың ажырамас бөлігі болып табылатын 2-қосымшада көрсетілген) жол беріледі. Атаулардың ауқымды номенклатуралық тізбесі бар тауарлар легін өткізу жағдайында барлық тауарлар бір тауарлық позицияда жіктеліп, бірдей шыққан жері өлшеміне ие болса, сертификаттың қосымша парағын (парақтарын) ресімдеудің орнына тауарлардың толық тізбесі келтірілген тауарға ілеспе құжатты (шот-фактура, шот-проформа, көліктік жүкқұжат (коносамент) не тауардың сандық сипаттамасын көрсететін басқа да құжат) пайдалануға жол беріледі. Бірінші бетінде тиісті сертификаттың берілген күні мен тіркеу нөмірі көрсетілетін осы тауарға ілеспе құжат әкелетін елдің кеден органдарына сертификатпен қатар ұсынылады. Тауар ілеспе құжаттағы тауарлардың шыққан жері туралы мәліметтер сертификат берген уәкілетті органмен куәландырылады. Бұл ретте сертификаттың 8-бағанында тауарға тиісті ілеспе құжатқа, оның деректемелерін және парақтар санын көрсетумен, сілтеме жасалады; 9-баған - «Шыққан жерінің өлшемі». Тауар шыққан жердің келесі өлшемдері көрсетіледі: «Р» - тауар толығымен экспорттаушы елде өндірілген; «Ү» (өндіруші франко-зауыт бағасының базасында анықталатын экспортталатын тауар құнындағы тауарды өндіру кезінде пайдаланылған, басқа мемлекеттен шығарылған немесе шығарылған елі белгісіз шикізат, жартылай фабрикаттар немесе дайын бұйымдар құнының пайыздық үлесін көрсете отырып, мысалы «Ү15%»); «Рk» - тауар кумулятивтік қағидатын пайдаланумен шығарылған. Егер сертификатта бір бөлігі Тауарларды сипаттау мен кодтаудың үйлестірілген жүйесінің төрт мәнді тауар позициясының бірінде жіктелген түрлі тауарға өтініш берілсе, 9-бағанда осы төрт мәнді тауар позициясының барлық тауарлары үшін шығу өлшемінің бір әріптік белгіленуін көрсетуге жол беріледі. Егер сертификатта Тауарларды сипаттау мен кодтаудың үйлестірілген жүйесінде әртүрлі тауар позицияларында жіктелген тауарларға өтініш берілсе және (немесе) шығу өлшемдері әртүрлі болған жағдайда, 9-бағанда өтініш берілген тауарлардың барлығы үшін шығу өлшемдері жіктеліп көрсетіледі; 10-баған - «Тауардың саны». Уағдаласушы тараптардың тауар номенклатураларына сәйкес тауардың брутто (таза) массасы (кг) және (немесе) басқа да сандық сипаттамалары көрсетіледі. Жеткізілген тауардың нақты саны сертификатта көрсетілген санының 5 %-ынан аспауы тиіс. Таза массасы бөлшек сауда кезінде тауардан бөлінбейтін бастапқы орамасын есепке ала отырып көрсетіледі. 11-баған — «Шот-фактураның нөмірі мен күні». Шот-фактура, немесе шот-проформа, немесе тауардың қаржылық және (немесе) сандық параметрлері туралы басқа құжат жөніндегі мәліметтер көрсетіледі; 12-баған — «Куәлік». Уәкілетті орган толтырады және оның атауын, мекенжайын, мөрін және сертификат (телнұсқа) берілген күнді, сондай-ақ сертификатты (телнұсқаны) растауға уәкілетті адамның қолын, тегін және аты мен әкесінің атын қамтиды. Күнді, сондай-ақ уәкілетті адамның тегін, аты мен әкесінің атын қолмен жазуға немесе мөртабан қоюға жол беріледі; 13-баған — «Өтініш берушінің декларациясы». Тауар толығымен өндірілген немесе жеткілікті өңдеуге (қайта өңдеуге) ұшыраған ел, тауардың шыққан елі туралы мәліметтің мәлімделген күні көрсетіледі және өтініш берушінің мөрі, қолы, тегі, аты мен әкесінің аты жазылады. Күнді, сондай-ақ өтініш берушінің қолын, тегін, аты мен әкесінің атын қолмен жазуға немесе мөртабан қоюға жол беріледі. Тауарды жеке тұлға - Уағдаласушы тараптардың бірінің резиденті әкеткен (әкелген) жағдайда, СТ-2 нысанындағы сертификат келесі ерекшеліктерді ескере отырып толтырылады: 1-баған - жүк жөнелтушінің тегі, аты мен әкесінің аты және оның мекенжайы көрсетіледі; 2-баған - деректер болған жағдайда жүк алушының тегі, аты мен әкесінің аты, оның мекенжайы көрсетіледі, сондай-ақ «Еркін айналым үшін» белгісі қойылады. Жүк жөнелтушінің де және жүк алушының да бір тұлға болуы мүмкін екендігіне жол беріледі; 5 және 11-бағандар деректер болмаған жағдайда толтырылмаған қалпында қалуы мүмкін; 13-баған тауардың шыққан елі туралы мәліметтерді мәлімдеу күнін, сондай-ақ жүк жөнелтушінің тегін, аты мен әкесінің атын көрсете отырып, жүк жөнелтушінің қолымен расталады. 6. Сертификатты бланктің екінші жағында толтыруға жол берілмейді.