Тармақ 1. Егер тауар өңдеуге немесе қайта өңдеуге ұшыраса және егер осы процесте пайдаланылған, басқа мемлекеттерден (Уағдаласушы тараптар болып табылмайтын) шыққан материалдардың (шикізаттың, жартылай фабрикаттардың және дайын бұйымдардың) құны немесе шыққан жері белгісіз тауарлардың құны экспортталатын тауар құнының 50 пайызынан аспайтын болса, тауар Уағдаласушы тараптар мемлекеттерінің бірінде жеткілікті өңдеуге немесе қайта өңдеуге ұшыраған деп саналады. 2. Өңдеу немесе қайта өңдеу процесінде пайдаланылған, басқа мемлекеттерден (Уағдаласушы тараптар болып табылмайтын) шыққан материалдардың (шикізаттың, жартылай фабрикаттардың және дайын бұйымдардың) құны оларды өңдеу немесе қайта өңдеу жүзеге асырылатын Уағдаласушы тарап мемлекетінде белгіленген осы материалдардың кедендік құнының негізінде айқындалады. Осы баптың 1-тармағында көзделген шыққан жері белгісіз тауарлардың құны оларды өңдеу немесе қайта өңдеу жүзеге асырылатын Уағдаласушы тарап мемлекетінің аумағында осы материалдарға төленген бағаның мөлшерінде айқындалады. Уағдаласушы тараптар мемлекеттерінің бірінен экспортталатын тауардың құны «Инкотермс» сауда терминдері түсінігінің халықаралық қағидаларына сәйкес тауарды дайындаушы франко-зауыт бағасының базасында айқындалады.