Тармақ 1. Атқарушы Комитет Бас Ассамблеяға бағынады. Оның міндеттері мен өкілеттіктері мыналар: (а) Бас Ассамблеяның жалпы саясатына сәйкес ұйымның әртүрлі органдарының тиімді қызметін қамтамасыз ету; (b) жиналыстардың (сессиялардың, жұмыс және сарапшылар топтарының) жалпы күнтізбесін бекіту; (с) мүше мемлекеттермен және Бас директормен консультация өткізе отырып, жоспарлы және кезектен тыс сессиялардың алдын ала бағдарламасын және мәселелер тізімін дайындау; (d) Ұйым сессиясына сарапшы немесе байқаушы ретінде қатысу үшін қандай да бір тұлғаны немесе ұйымды шақырудың орындылығына байланысты мәселелерді шешу; (е) Ұйымның бюджетіне және бухгалтерлік есептілігіне шолу жүргізу, сондай-ақ оларды Бас Ассамблеяға жолдау; (f) қажеттігіне қарай Мамандандырылған Комитеттерді қалыптастыру және олардың іс-қимылдарының бағдарламасын дайындау, олардың мүшелерін тағайындау және олардың жұмыс мерзімін белгілеу; (g) Бас Ассамблеяға Ұйым органдарының қызметіне жататын нақтыланған есептерді ұсыну; (h) Ұйым қызметіне қадағалауды жүзеге асыру және Бас Ассамблеяның қарарларына, Атқарушы Кеңестің шешімдеріне және ішкі нормалар мен қағидаларға сәйкес оның барлық функцияларын орындауын қамтамасыз ету; (і) тамақтану, азық-түлік және ауыл шаруашылығы саласындағы ғылыми, технологиялық, әлеуметтік және экономикалық зерттеулерді жүргізу және бақылау; (j) ауыл шаруашылығын, биотехнологияларды және өндірістік практикалар модельдерін тұрақты дамытуға, оның ішінде суаруға, тұқым өндірісіне, пестицидтерге және ауыл шаруашылығын басқаруға қатысты ақпаратпен, деректермен, зерделеумен және зерттеулермен алмасу; (k) ауыл шаруашылығы процестерін жаңғыртуды ынталандыру және институционалдық әлеуетті өрістету; (l) мүше мемлекеттердегі ауыл шаруашылығының тұрақты дамуын және азық-түлік қауіпсіздігін қамтамасыз ету үшін қаржы және ауыл шаруашылығы ресурстарын жаңғыртуға және басқаруға ұмтылу; (m) микро-қаржылық жобалар, әлеуетті кеңейту, халықаралық жобалар және ИЫҰ-ның қаржылық өнімдеріне қолжетімділікті оңайлату арқылы ИЫҰ ішіндегі инвестицияларды ауыл шаруашылығына және азық-түлік қауіпсіздігіне ынталандыру; және (n) Ұйымның міндеттерін орындау мақсатында тиісті ұлттық және өңірлік бағдарламаларды, халықаралық бағдарламаларды, құқықтық және азық-түлік қауіпсіздігі саласындағы өзге де нормалар мен қағидаларды әзірлеу және жүзеге асыру болып табылады.