Тармақ 1. Сұрау салынатын Мемлекетте жүрген, осы Шартқа сәйкес айғақтар беру талап етілетін адам қажет болған кезде келуге және айғақтар беруге немесе құжаттарды, материалдарды немесе заттай дәлелдемелерді қоса алғанда, заттарды табыс етуге міндетті.
Тармақ 2. Сұрау салынатын Мемлекеттің орталық органы өтініш болған кезде айғақтарды алудың немесе дәлелдемелерді қабылдап алудың күні және орны туралы алдын ала ақпарат береді.
Тармақ 3. Сұрау салынатын Мемлекет сұрау салуды орындау барысында сұрау салуда көрсетілген адамдардың қатысуына жол береді және бұл адамдарға айғақтар немесе дәлелдемелер беретін адамға сұрақтар қоюына рұқсат етеді.
Тармақ 4. Егер осы баптың 1-тармағында аталған адам Сұрау салушы Мемлекеттің заңнамасына сәйкес өзінің иммунитеті, әрекетке қабілетсіздігі немесе артықшылықтары туралы мәлімдесе, айғақтар оған қарамастан алынуы тиіс, ал оның жасаған мәлімдемесі туралы Сұрау салушы Мемлекеттің орталық органы сол Тарап органдарының шешім қабылдауы үшін хабардар етіледі.
Тармақ 5. Сұрау салынатын Мемлекеттің аумағында осы бапқа сәйкес алынған немесе осы бапқа сәйкес алынған айғақтардың нысаны болып табылатын дәлелдемелер куәландыру жолымен, оның ішінде, егер сөз осы Шартқа қоса берілген А нысанында көрсетілген тәртіппен іскерлік құжаттар туралы болса, расталуы мүмкін. А нысанымен расталған құжаттар Сұрау салушы Мемлекеттің дәлелдемелері ретінде қабылданады.