Тармақ 1. Үй-жайлар мен аумақтарды кедендік қарап тексеру - үй-жайлар мен аумақтарға, оның ішінде көрсетілген орындардағы тауарларға және (немесе) құжаттарға көзбен қарап тексеру жүргізуді білдіретін кедендік бақылау нысаны.
Тармақ 2. Үй-жайлар мен аумақтарды кедендік қарап тексеру қарап тексерілетін үй-жайларда және (немесе) аумақтарда кедендік бақылау объектілері болып табылатын тауарлардың және (немесе) құжаттардың бар немесе жоқ болуын тексеру мақсатында, сондай-ақ мұндай тауарлар және (немесе) құжаттар туралы мәліметтерді тексеру және (немесе) алу және тауарларда, көлік құралдарында және олардың жүк тиейтін орынжайларында (бөліктерде) кедендік пломбалардың, мөрлердің және басқа сәйкестендіру құралдарының бар болуын тексеру мақсатында жүргізіледі.
Тармақ 3. Үй-жайлар мен аумақтарды кедендік қарап тексеруді кеден органдары уақытша сақтау қоймалары, кеден қоймалары, еркін қоймалары, бажсыз сауда дүкендері ретінде пайдалануға арналған немесе пайдаланылатын, сондай-ақ уәкілетті экономикалық операторлардың тауарларды уақытша сақтауына арналған немесе пайдаланылатын құрылыстардың, орынжайлардың (орынжай бөліктерінің) және (немесе) ашық алаңдардың (ашық алаңдар бөліктерінің) сәйкестігін, осы Кодекстің 411-бабының 4-тармағына, 416-бабының 5-тармағына, 421-бабының 4-тармағына, 426-бабының 4-тармағына және 433-бабы 3-тармағының 4-тармақшасына сәйкес белгіленген талаптар мен шарттарға сәйкес келуін тексеру мақсатында жүргізуі мүмкін.
Тармақ 4. Егер бұл мүше мемлекеттердің заңнамасында көзделсе, орынжайлар мен тұрғын үй жайлардағы аумақтарды кедендік қарап тексеруді жүргізуге жол беріледі.
Тармақ 5. Үй-жайлар мен аумақтарды кедендік қарап тексеру үй-жайлар мен аумақтарды кедендік қарап тексеру жүргізуге арналған ұйғарым және кеден органы лауазымды тұлғасының қызметтік куәлігі ұсынылған кезде жүргізіледі.
Тармақ 6. Үй-жайлар мен аумаққа кіруге рұқсат берілмеген жағдайда кеден органдарының лауазымды тұлғалары мүше мемлекеттердің заңнамасына сәйкес қарсылықтың жолын кесіп және (немесе) жабық үй-жайларды ашып кіруге құқылы.
Тармақ 7. Егер мүше мемлекеттің заңнамасында жекелеген объектілерге кірудің арнайы тәртібі көзделсе, онда мұндай кіру осы мүше мемлекеттің заңнамасында белгіленген тәртіппен жүзеге асырылады.
Тармақ 8. Үй-жайлар мен аумақтарды кедендік қарап тексеру оны өткізу үшін қажет болатын қысқа мерзімде жүргізілуі тиіс және егер мүше мемлекеттердің кедендік реттеу туралы заңнамасында өзге мерзім белгіленбесе, 1 жұмыс күнінен артық созылуы мүмкін емес.
Тармақ 9. Үй-жайлар мен аумақтарды кедендік қарап тексеру нәтижелері нысанын Комиссия айқындайтын үй-жайлар мен аумақтарды кедендік қарап тексеру актісін жасау арқылы ресімделеді.
Тармақ 10. Үй-жайлар мен аумақтарды кедендік қарап тексеру актісі 2 данада жасалады, олардың бірі үй-жайы және (немесе) аумағы қарап тексерілген тұлғаға, егер бұл тұлға белгіленсе, табыс етіледі.