Тармақ 3. 1 Жетекші мемлекет ретінде Үндістан батальон қолбасшылығын, басқармасы мен штабын, үш атқыштар ротасын, механикаландырылған жаяу әскерлер ротасын, штабтық ротаны және қамтамасыз ету ротасын, жалпы алғанда 730 әскери қызметшіні қамтамасыз етеді.
Тармақ 3. 2 Қолдау көрсететін мемлекет ретінде Қазақстан батальон штабының құрамындағы екі штабтық офицерді қоса алғанда, 120 әскери қызметшіден тұратын атқыштар ротасын береді.
Тармақ 3. 3 Қазақстандық бітімгершілік контингенттің жеке құрамында БҰҰЛУК-та өрістетілу үшін қызметтік паспорттары болуға тиіс.
Тармақ 3. 4 ҮНДІҚАЗБАТ-тың жалпы саны 850 адамды құрайды.
Тармақ 3. 5 Қазақстандық ротаның ұйымдық-штаттық құрылымын Тараптар осы Меморандумға Техникалық келісімде айқындайды.
Тармақ 3. 6 Жеке құрамды БҰҰЛУК-қа және БҰҰЛУК шығыс секторының штаб-пәтеріне жіберу мәселесі Тараптар мен БҰҰ арасында реттелуге тиіс және осы Меморандумның нысанасы болып табылмайды.
Тармақ 3. 7 Қазақстандық бітімгершілік контингент өзінің жеке қаруымен өрістетіледі. БҰҰЛУК-та негізгі мүлікті өрістету Жетекші мемлекет пен БҰҰ арасындағы қарым-қатынастардың нысанасы болып табылады. Қазақстандық бітімгершілік контингентке тиесіліні қоса алғанда, негізгі мүлікті БҰҰЛУК-та кез келген қосымша өрістету Жетекші мемлекет пен БҰҰ арасындағы талқылау нысанасы болып табылады.
Тармақ 3. 8 БҰҰ кір жуу және тазалап-жинау қызметтерін көрсетуді, жалпы және түнгі қадағалау объектілерін, базалық медициналық және 1-деңгейдегі қамтамасыз етуді, стоматологиялық қамтамасыз етуді қоспағанда, контингентті барлық тиісті санаттарда қолдайды.
Тармақ 3. 9 Үндістан Тарапы қазақстандық бітімгершілік контингентке базалық және 1-деңгейдегі медициналық қамтамасыз етуді, сондай-ақ стоматологиялық қызмет көрсетуді ұсынады.
Тармақ 3. 10 Қазақстандық бітімгершілік контингент БҰҰ-ның талаптарына/нұсқаулықтарына сәйкес өзінің жеке құрамы үшін өзін кір жуу және тазалап-жинау қызметтерімен, сондай-ақ жалпы және түнгі қадағалау объектілерімен дербес қамтамасыз етеді.
Тармақ 3. 11 Тараптар БҰҰ-ның Жетекші және Қолдау көрсететін мемлекеттер контингенттерінің меншігіндегі жабдыққа тоқсан сайын инспекция жүргізетінімен келіседі.