Тармақ 1. Құқық иеленушінің Одақтың тауар белгісіне айрықша құқыққа иелік етуге құқығы бар.
Тармақ 2. Одақтың тауар белгісіне айрықша құқық құқықты беру (басқаға беру, иеліктен шығару), пайдалануға құқық беру (лицензиялық (қосалқы лицензиялық) шарт, кешенді кәсіпкерлік лицензия шарты (коммерциялық концессия (субконцессия) шарты), кепілге беру немесе осы мүше мемлекетте тіркелген тауар белгілері үшін мүше мемлекеттің заңнамасында көзделген тәсілдермен өзге де иелік ету, сондай-ақ әмбебап құқықтық мирасқорлық тәртібімен және құқық иеленушінің мүлкін өндіріп алу кезінде ауысу объектісі болуы мүмкін.
Тармақ 3. Одақтың тауар белгісіне айрықша құқық беру туралы (басқаға беру, иеліктен шығару) шарт бойынша өтінім беру ведомствосы мемлекетінің заңнамасында белгіленген тәртіппен өтінім беру ведомствосында тіркелуге жатады.
Тармақ 4. Одақтың тауар белгісіне айрықша құқық заңнамасы тауар белгісіне айрықша құқық кепілін көздейтін мүше мемлекетте (мүше мемлекеттерде) кепіл нысанасы болуы мүмкін.
Тармақ 5. Лицензиялық (қосалқы лицензиялық) шарт немесе өзге де шарт бойынша Одақтың тауар белгісін пайдалану құқығын беру аумағында Одақтың тауар белгісін пайдалану құқығы берілетін мүше мемлекеттің ұлттық патенттік ведомствосында осы мүше мемлекеттің заңнамасында белгіленген тәртіппен тіркелуге жатады.
Тармақ 6. Одақтың тауар белгісіне айрықша құқыққа иелік етуді тіркеу үшін шарт бойынша тіркеу жүзеге асырылатын мүше мемлекеттің заңнамасында белгіленген мөлшерде баж төленеді.
Тармақ 7. Лицензиялық шарт немесе сол арқылы мүше мемлекеттің заңнамасына сәйкес Одақтың тауар белгісін пайдалану құқығы берілетін өзге де шарт, Одақтың тауар белгісіне айрықша құқық кепілі туралы шарт тарапы (тараптары) аумағында шарт бойынша айрықша құқыққа тиісті иелік ету тіркелген мүше мемлекеттің ұлттық патенттік ведомствосын осы мүше мемлекеттің заңнамасында айқындалған тәртіппен осындай шарттардың қолданылуын өзгерту немесе тоқтату туралы хабардар етуге міндетті.