Тармақ 1. Осы Заңда және Қазақстан Республикасының өзге де заңдарында белгіленген, мемлекеттік фельдъегерлік қызметте қызмет атқарудың ерекше сипаты және қызметкерлердің жауаптылығы қосымша әлеуметтік құқықтармен және жеңілдіктермен өтеледі.
Тармақ 2. Мемлекеттік фельдъегерлік қызмет қызметкерінің бiр елді мекеннен кемінде елу километрден асатын қашықтықтағы екiншiсіне көшуiне байланысты қызмет бабымен орын ауыстыруы және ілгерілеуі кезінде қызметкердің өзiне екi айлық ақшалай қамтым мөлшерінде және онымен бiрге көшкен әрбiр отбасы мүшесiне оның айлық ақшалай қамтымының жартысы мөлшерінде көтерме жәрдемақы төленедi.
Тармақ 3. Қызмет өткеру кезеңінде мемлекеттік наградалар - ордендермен наградталған мемлекеттік фельдъегерлік қызмет қызметкерлеріне қызметтен босатылған кездегі біржолғы жәрдемақы мөлшері олардың айлық ақшалай қамтымының екі айлықақысына ұлғайтылады.
Тармақ 4. Мемлекеттік фельдъегерлік қызмет қызметкерлерінің, оның ішінде қызмет өткеру кезеңінде қаза болған, қайтыс болған немесе хабарсыз кеткен қызметкерлерінің балаларына жергілікті атқарушы органдар тұрғылықты жері бойынша мектепке дейінгі ұйымдардан кезектен тыс орын береді.
Тармақ 5. Мемлекеттік фельдъегерлік қызмет қызметкерлерін зейнетақымен қамсыздандыру, мүгедектігі бойынша мемлекеттік әлеуметтік жәрдемақылар төлеу Қазақстан Республикасының әлеуметтік қорғау туралы заңнамасында белгіленген тәртіппен және шарттарда жүзеге асырылады.