Тармақ 1. Қазақстан тарапы Астана халықаралық әуежайында қатысушыларды қарсы алу үшін арнайы таған ұйымдастыруды, оларды қонақүйлерге және сессия аяқталғаннан кейін қонақүйлерден кері жеткізуді ұйымдастыруды қоса алғанда, осы Келісімнің 9-бабының 1-тармағына сәйкес барлық қатысушылардың Қазақстанға кіруіне және Қазақстаннан шығуына жәрдемдесу үшін қажетті шараларды қабылдайды.
Тармақ 2. Қазақстан тарапы Ұйыммен кеңесе отырып, Ұйымның Еуропалық өңірлік офисінің бас директорының, өңірлік директорының (бұдан әрі - Ұйымның өңірлік директоры) және сессияға қатысатын кез келген басқа да жоғары деңгейдегі лауазымды тұлғалардың келуі мен кетуі үшін арнайы хаттамаларды қамтамасыз етеді.
Тармақ 3. Қазақстан тарапы сессияға қажетті жабдықтардың, материалдар мен құжаттардың жергілікті тасымалы үшін көлік құралдарын Ұйымға өтеусіз ұсынады, Өңірлік комитеттің таңдаулы лауазымды тұлғалары, Ұйымның бас директоры мен өңірлік директоры үшін жүргізушілері бар ресми автокөлікті қамтамасыз етеді, сондай-ақ осындай көлікпен байланысты барлық шығыстарға, сондай-ақ оларға уақтылы жанармай құюға, техникалық қызмет көрсетуге және сақтандыруға жауапты болады.
Тармақ 4. Қазақстан тарапы сессияның ресми өткізілетін орны мен өңірдегі мүше мемлекеттердің өкілдері, өкілдерінің орынбасарлары, кеңесшілері және Ұйым Хатшылығының қызметкерлері тұратын қонақүйлер арасында жүретін арнайы көлікті де Ұйымға өтеусіз ұсынады. Осы мақсаттарға бөлінген көлік құралдарының жүру графигі Ұйыммен консультация барысында айқындалатын болады.