Тармақ 1. Тараптардың құзыретті органдарының лауазымды адамдары фитосанитариялық бақылау жүргізу кезінде карантинге жатқызылған материалдың партиясында карантиндік зиянды организмдерді анықтаған жағдайда, карантинге жатқызылған материал партияларына оның иесінің есебінен зарарсыздандыру жүргізу немесе қайтару қажеттігі туралы, ал карантинге жатқызылған материал партияларын зарарсыздандыру немесе қайтару мүмкін болмаған кезде оларды жоюға нұсқама береді. Барлық жағдайларда Тараптардың құзыретті органдары Конвенцияның Фитосанитариялық шаралар жөніндегі халықаралық стандартының (ISPM 13) талаптарына орай сәйкессіздігі туралы біріне-бірі ақпарат беруге тиіс.
Тармақ 2. Екінші Тарап мемлекетінің аумағына әкелінетін жүктермен Конвенцияның Фитосанитариялық шаралар жөніндегі халықаралық стандартының (ISPM 12) талаптарына сәйкес фитосанитариялық немесе кері экспорттық фитосанитариялық сертификат бірге жүруге тиіс.
Тармақ 3. Тараптардың құзыретті органдары өз мемлекеттерінің өсімдіктер карантині және оларды қорғау саласындағы халықаралық міндеттемелеріне және ұлттық заңнамаларына сәйкес жүктер мен оларды тасымалдау құралдарын жете тексеру және қажет болған кезде, зертханалық зерттеу, өңдеу жүргізу үшін шаралар, сондай-ақ карантиндік зиянды организмдердің өз мемлекеттерінің. аумағына енуін болғызбау үшін өзге де шаралар қолданады.
Тармақ 4. Тараптар мемлекеттерінің мемлекеттік шекарасы арқылы карантинге жатқызылған материалдың партияларын әкелу пункттері олардың ұлттық заңнамаларына сәйкес айқындалады.
Тармақ 5. Бір Тарап жүктерді екінші Тарап мемлекетінің аумағына тасымалдау үшін пайдаланатын көлік құралдары мұқият тазартылуға және қажет болған кезде зарарсыздандырылуға тиіс.
Тармақ 6. Карантинге жатқызылған материалдарды әкелген және әкеткен кезде буып-түю материалы ретінде Конвенцияның Фитосанитариялық шаралар жөніндегі халықаралық стандартына (ISPM 15) сәйкес арнайы өңдеуден өткен, ағаштан жасалған буып-түю материалдары, сондай-ақ карантиндік зиянды организмдердің тасымалдаушысы болмайтын жоңқа, қағаз, пластик және басқа да материалдар қолданылатын болады. Тараптардың құзыретті органдары карантиндік зиянды организмдердің тасымалдаушысы болуы мүмкін топырақтың (торфты қоспағанда), топырағы бар тірі тамырланған өсімдіктердің импортына тыйым салады.