Осы қосымшада ешнәрсе кеден органдарының кедендік құнды айқындау мақсаттары үшін ұсынылған кез келген өтініштің, құжаттың немесе декларацияның анықтығына немесе дәлдігіне қандай да бір түрде көз жеткізу құқығын шектейтін немесе күмән келтіретін болып түсіндірілмеуге тиіс.
Тармақ 1. 1 – 7-баптар 5-қосымшаның ережелеріне сәйкес импортталатын тауарлардың кедендік құнын айқындау тәртібін белгілейді. Кедендік құнды айқындау әдістері оларды қолдану реті бойынша келтірілген. Кедендік құнды айқындаудың бастапқы әдісі 1-бапта белгіленген, ондағы көзделген шарттар орындалған сайын, импортталатын тауарлар осы баптың ережелеріне сәйкес бағалануға тиіс.
Тармақ 2. Егер кедендік құн 1-баптың ережелеріне сәйкес айқындалмаса, ол кедендік құн айқындалуы мүмкін олардың бірінші бабына дейін келесі баптарды дәйекті қарау арқылы айқындалуға тиіс. 4-бапта көзделген ережені қоспағанда, реті бойынша келесі баптың ережелері кедендік құн қаралатын баптың ережелеріне сәйкес айқындалмайтын жағдайда ғана пайдаланылуы мүмкін.
Тармақ 3. Импорттаушының 5 және 6-баптарды қолдану кезектілігін өзгерту туралы өтініші болмаған кезде көрсетілген баптарды қолданудың белгіленген кезектілігі сақталады. Егер импорттаушы осындай кезектілікті өзгерту туралы өтініш білдірсе, алайда кейіннен кедендік құнды 6-баптың ережелеріне сәйкес айқындау мүмкін болмайтыны анықталса, онда мұндай кедендік құн, егер ол көрсетілген бапты қолдану арқылы белгіленуі мүмкін болса, 5-баптың ережелеріне сәйкес айқындалуға тиіс.
Тармақ 4. Егер кедендік құн 1 – 6-баптардың ережелеріне сәйкес айқындалмаса, мұндай құн 7-баптың ережелеріне сәйкес айқындалуға жатады.
Тармақ 1. "Бухгалтерлік есепке алудың жалпыға бірдей қабылданған қағидаттары" деген термин жалпы келісім негізінде танылған немесе тиісті уақыт кезеңінде елде елеулі деп танылып, қолдауға ие болған қандай экономикалық ресурстар мен міндеттемелер активтер мен міндеттемелер ретінде тіркелуге тиіс екеніне, активтер мен міндеттемелердегі қандай өзгерістер тіркелуге тиіс екеніне, активтер мен міндеттемелер және олардағы өзгерістер қалай өлшенуге тиіс екеніне, қандай ақпарат және қандай жолмен ашылуға тиіс екеніне және қандай қаржылық есептілік дайындалуға тиіс екеніне қатысты нормаларды білдіреді. Бұл нормалар жалпы қолданылатын ауқымды басшылыққа алынатын қағидаттарды да, егжей-тегжейлі практикалық әдістер мен рәсімдерді де білдіруі мүмкін.
Тармақ 2. 5-қосымшаның мақсаттары үшін Тараптардың әрқайсысының кеден органдары осы елде бухгалтерлік есепке алудың жалпыға бірдей қабылданған қағидаттарына сәйкес дайындалған және тиісті бапты қолдану үшін қажетті ақпаратты пайдаланады. Мысалы, 5-баптың ережелеріне сәйкес қарапайым пайда мен жалпы шығыстарды айқындау импорт еліндегі бухгалтерлік есепке алудың жалпыға бірдей қабылданған қағидаттарымен үйлесетін тәсілмен дайындалған ақпаратты пайдалану арқылы жүзеге асырылуға тиіс еді. Екінші жағынан, 6-баптың ережелеріне сәйкес қарапайым пайда мен жалпы шығыстарды айқындау өндіріс еліндегі бухгалтерлік есепке алудың жалпыға бірдей қабылданған қағидаттарымен үйлесетін тәсілмен дайындалған ақпаратты пайдалану арқылы жүзеге асырылуға тиіс еді. Тағы бір мысал ретінде импорт елінде жүргізілген 8-баптың 1 (b) тармағының "ii" тармақшасында көрсетілген шығыстар бойынша қосымша есепке жазуларды айқындауды келтіруге болады. Көрсетілген жағдайда мұндай шығыстарды айқындау осы елдің бухгалтерлік есепке алудың жалпыға бірдей қабылданған қағидаттарымен үйлесетін тәсілмен дайындалған ақпаратты пайдалану арқылы жүзеге асырылуға тиіс еді.