Тармақ 1. Эндаумент-қор (нысаналы капитал) құрылтай құжатында және (немесе) қамқоршылық кеңестің эндаумент-қор (нысаналы капитал) құру туралы шешімінде белгіленген талаптарда сыйға тарту, қайырмалдық немесе нысаналы салым шартының (шарттарының), сондай-ақ өсиеттің, нысаналы капитал қоры құрылтайшылары жарналарының, ерікті қайырмалдықтардың, инвестициялық кірістердің негізінде ұлттық және шетел валютасындағы ақша, жылжымалы және жылжымайтын мүлік, бағалы қағаздар, ұлттық валютадағы ақшалай бағасы бар өзге де мүлік және мүліктік құқықтар есебінен қалыптастырылады және (немесе) толықтырылады.
Тармақ 2. "Қайырымдылық туралы" Қазақстан Республикасының Заңына сәйкес қайырымдылық объектілерін қаржыландыруға арналған қайырмалдықтарды эндаумент-қор (нысаналы капитал) активтерінің құрамына енгізуге жол берілмейді.
Тармақ 3. Эндаумент-қордың (нысаналы капиталдың) оны өзге эндаумент-қорларға (нысаналы капиталдарға) қатысты сәйкестендіретін және пайда алушының атын немесе атауын қамтитын жеке атауы болуға тиіс.
Тармақ 4. Нысаналы салым шарты шеңберінде берілген мүлікті қоспағанда, эндаумент-қорға (нысаналы капиталға) енгізілген мүлік нысаналы капитал қорының меншігіне айналады.
Тармақ 5. Эндаумент-қорды (нысаналы капиталды) үшінші тұлғалардың құқықтарымен ауыртпалық салынған мүлікпен қалыптастыруға және (немесе) толықтыруға жол берілмейді.
Тармақ 6. Нысаналы капитал қоры сенімгерлік басқару шарттарының негізінде, сондай-ақ сыйға тарту, қайырмалдық немесе нысаналы салым шартында (шарттарында), сондай-ақ өсиетте эндаумент-қорды (нысаналы капиталды) қалыптастырудың әртүрлі мақсаттары айқындалған жағдайларда, бірнеше эндаумент-қорды (нысаналы капиталды) қалыптастыруға құқылы.
Тармақ 7. Осы Заңда көзделгеннен өзге мақсаттарға эндаумент-қорды (нысаналы капиталды) қалыптастыруға, толықтыруға және инвестициялық кірісті пайдалануға жол берілмейді.