Агенттіктiң өз қызметiн жүзеге асыру үшiн: 1) инвесторлардан, орталық және жергiлiктi атқарушы органдардан барлық қажеттi ақпаратты сұратуға және алуға; 2) келiсiм-шартқа сараптама жүргiзу және оны әзiрлеу үшiн тиiстi мемлекеттiк органдардың мамандарын, Қазақстан Республикасы мен басқа мемлекеттердiң жеке және заңды тұлғалары қатарынан кеңесшiлер, консультанттар мен сарапшылар тартуға; 3) Қазақстан Республикасында жүзеге асырылатын инвестициялық жобаларға шет елдiң қатысуын ынталандыру мақсатымен Қазақстан Республикасының орталық және жергiлiктi атқарушы органдары мен шетелдегi дипломатиялық миссиялары қызметiн үйлестiруге; 4) келiсiм-шарттарды әзiрлеуге және iске асыруға байланысты мәселелер жөнiнде министрлiктердiң, мемлекеттiк комитеттердiң және өзге де орталық және жергiлiктi атқарушы органдардың мiндеттi орындауы үшiн қаулылар шығаруға құқығы бар. Министрлiктердiң, мемлекеттiк комитеттердiң және өзге де орталық және жергiлiктi атқарушы органдардың инвестициялық қызметтi шектеуге байланысты мәселелер жөнiндегi актiлерi мiндеттi түрде Агенттікпен келiсiлуге тиiс.