Тармақ 1. Осы Келiсiмнiң I және II қосымшаларына осы бапта жазылған рәсiмге сәйкес түзетулер енгiзiлуi мүмкiн.
Тармақ 2. Кез келген Уағдаласушы тараптың өтiнiшi бойынша оның І және ІІ қосымшаларға түзету енгiзу туралы кез келген ұсынысын Бiрiккен Ұлттар Ұйымының Еуропалық экономикалық комиссиясының Құрамдастырылған тасымалдар жөнiндегi жұмыс тобы қарайды.
Тармақ 3. Түзетулер дауыс беруге келген және қатысқан Уағдаласушы тараптардың көпшiлiгiмен мақұлданған жағдайда Бiрiккен Ұлттар Ұйымының Бас хатшысы ұсынылған түзетудi қабылдау үшiн тiкелей мүдделi Уағдаласушы тараптарға жолдайды. Осы баптың мақсаттары үшiн, егер жаңа желiнi, маңызды терминалды, шекара бекетiн, доңғалақ жұптарын ауыстыру станциясын немесе темiржол-паром өткелiн/портын iске қосу жағдайында немесе олар, тиiсiнше, өзгертiлген жағдайда оның аумағы осы желiмен қиылысқанда, немесе маңызды терминалмен тiкелей қосылғанда, немесе қаралатын маңызды терминал, шекара бекетi, доңғалақ жұптарын ауыстыру станциясы немесе темiржол-паром өткелiнiң/портының соңғы пунктi көрсетiлген аумақта орналасқанда, Уағдаласушы тарап тiкелей мүдделi болып есептеледi.
Тармақ 4. Осы баптың 2 және 3-тармақтарына сәйкес жолданған кез келген ұсынылған түзету егер депозитарий оны жолдаған уақыттан бастап алты ай мерзiм iшiнде тiкелей мүдделi Уағдаласушы тараптардың бiрi де Бiрiккен Ұлттар Ұйымының Бас хатшысына ұсынылған түзетуге қарсы екенi туралы мәлiмдемесе, қабылданған болып есептеледi.
Тармақ 5. Бiрiккен Ұлттар Ұйымының Бас хатшысы депозитарий ол туралыхабарлаған күннен бастап үш ай өткен соң күшiне енетiн, осындай түрде қабылданған кез келген түзету туралы барлық Уағдаласушы тараптарға хабарлайды.
Тармақ 6. Егер ұсынылған түзетуге қарсы осы баптың 4-тармағына сәйкесқарсылық туралы мәлiмдеме жiберiлсе, түзету қабылданбады деп есептеледi және күшi болмайды.
Тармақ 7. Еуропалық экономикалық комиссияның хатшылығы ұсынылған түзетуде тiкелей мүдделi Уағдаласушы тараптар туралы депозитарийге кiдiрiссiз хабарлайды.