Тармақ 1. Егер Тарап немесе ол уәкілеттік берген орган сақтандыру шарты бойынша кепілдік негізінде немесе Тарап пен инвестор арасындағы шартта көзделген коммерциялық емес тәуекелдерден кепілдіктердің өзге де нысанында инвестицияға қатысты өзі берген коммерциялық емес тәуекелдерден келтірілген залалдың өтемін осындай Тараптың инвесторына төлеуді жүзеге асырса, екінші Тарап инвестордың мұндай инвестицияға байланысты құқығының немесе талабының суброгация арқылы бірінші Тарапқа немесе ол уәкілеттік берген органға берілгенін таниды.
Тармақ 2. Осы баптың 1-тармағына сәйкес берілген құқықтар немесе талаптар инвестордың бастапқы құқықтарынан немесе талаптарынан артық болмауға тиіс. Мұндай құқықтар немесе талаптар аумағында инвестициялар жүзеге асырылған Тараптың заңнамасына сәйкес, бірақ осы тараудың 30 және 31-баптарының және осы Келісімнің "Құру және қызметі" деген III тарауының 19 және 20-баптарының ережелеріне нұқсан келтірілмей жүзеге асырылады.
Тармақ 3. Егер Тарап немесе ол уәкілеттік берген орган осындай Тараптың инвесторына төлемді жүзеге асырса және инвестордың құқықтары мен талаптарын алса, мұндай инвестор, егер оған Тараптың немесе ол уәкілеттік берген органның атынан әрекет етуге уәкілеттік берілмесе ғана, көрсетілген құқықтар мен талаптарды екінші Тарапқа қарсы пайдаланбайды.