Тармақ 1. Егер ақпаратты ұсынған Тарап тікелей керісінше мәлімдеме жасамаса, осы Келісім шеңберінде алынған және ҚБХО ақпараттық жүйесінде орналастырылған ақпарат құпия болып табылады және оған Тараптардың заңнамасында көзделген ақпаратты қорғау режимі қолданылады.
Тармақ 2. Әрбір Тарап өзінің заңнамасына, осы Келісімге және қолданылатын өзге де халықаралық шарттарға сәйкес құпиялылық режимінің сақталуын қамтамасыз етеді, жауаптылық шараларын қолдануды қоса алғанда, осы Келісім шеңберінде алынған ақпаратты кездейсоқ немесе заңсыз жоюдан, өзгертуден, жария етуден, сондай-ақ кез келген өзге де заңсыз пайдаланудан қорғауға бағытталған қажетті ұйымдық-техникалық және құқықтық шараларды жүзеге асырады.
Тармақ 3. ҚБХО ақпараттық жүйесінде қамтылған ақпаратты пайдалану мақсаты мен мүмкіндігін осы ақпаратты ұсынатын Тарап айқындайды.
Тармақ 4. Осы Келісім шеңберінде алынған ақпарат оны орналастырған және (немесе) ұсынған Тараптың алдын ала жазбаша келісімінсіз ҚБХО ақпараттық жүйесінде орналастырылу, сұратылу және (немесе) ұсынылу мақсатынан өзге мақсаттарда пайдаланылмайды.